بلاش تكدب على نفسك

بلاش تكذب على نفسك

يجوز تغضب ...
يجوز تظهر كإنك وحش عـ الشاشة
يجوز تعمل حاجات وحاجات ..
لكن قلبك .. هيفضل برده كالعادة .. محلك سر!

***********************

وإيه هيضر .. لو انك تكسر العادة،
تكسّر كل قضبانك، وتخرج عـ البراح تصرخ
وتحرق رايتك البيضا ..
فتغلى وتغلى مـ الحسرة
تروح عـ "الكوفة" و"البصرة"،
تعدى بـ "دير يس" و"جنين"،
ويحرق قلبك المسكين .. دموع بنوتة غلبانة ..
فى غمضة عين .. تلاقى الأم ويـّا الأب،
واخواتها الخمس أولاد .. فى كوم أجساد
وحتى الدار .. عليها دار غراب البين
فوقعت فجأة من طولها...
تفوق البنت مـ الصدمة .. وكل احلامها عريانة
فترفع راسها للخالق،
وتدعى ربها وتمسح دموع فى بحورها غرقانة
أتارى البنت من "قـــانا"

***********************

وإيه "قـانا" ..؟!!!
وإيه ستين شهيد ماتوا؟
وإيه أطفال .. منشف دمهم خوفهم...
تفجر قنبلة فـ جوفهم ..
وفى الآخر .. تنادى بوقف طلق النار!!!
يا ريت الحرب طلقة نار...
يا ريت الضرب كان راجل قصاد راجل،
يا ريتك حتى لو تقدر فى يوم تختار...

***********************

دا بيت أهلك خلاص هدوه،
طريقكم للخلاص سدوه،
ولو حس الغريب بيكم .. بشربة ميّة ترويكم،
يقوموا بقوة ويصدوه

***********************

وكان ياما كان ..
وكانت عـ الأمل بتعيش ..
قلوب تحلم بحضن كبير
بيجمعهم .. يجمّعهم .. يحبّبهم فى خلق الله،
يصحيهم على البسمة .. يوضيهم من النسمة ..
يصلوا الفجر ويشقوا الصخور،
تطرح خضار فى خضار ..
قلوب كات راضية بالقسمة...
قلوب .. قلبك ماهوش منهم؛
لأنك لو تحس فـ يوم بأحوالهم، لكنت تغير
وكنت تطير لأبعد نقطة فى حدودك

***********************

وتثبت للحياة وجودك،
تروح تنسى ولو لحظة ..
هموم الأرض والمصنع،
بتحلم بالرغد فى العيشة .. قوللى ازاى
هتقدر من بعيد لبعيد .. تعدى الخندق الملغوم
عشان توصل لكون أوسع...
وقوللى ازاى .. تطهر مية الوادى ..
وأصل السم فى المنبع؟!!!

***********************

قلوب الطيبين ضاقت بقولة " آه "...
وصوت مبحوح بيستنصر..
ويدعى يقوى نصر الله
يا نصر الله ..
طريقك بالحفر مليان ..
وعمرك يوم ما كنت جبان،
فقوم ما تخافشى أو تضعف ..
لأن الحق كلمة " لأ " بتحقق حياة إنسان...

***********************

يا إنسان فى الهوان مكبوت،
ماهيش قصة حياة أو موت ...
سكوت .. واسمع لقولة " آه " ..
بتخرج من حشا الطفل الوليد .. تهديد...
تزمجر فى الفضا وتملاه،
تبشر بانتفاضة فجر كله حياة ..
هتحضن جثته وتبكى، وتغسل بالدموع قلبك،
تقوم تغضب .. وتحرق رايتك البيضا،
تحس القوة والقدرة ..
تروح عـ "الكوفة" و"البصرة"،
تعدى بـ "دير يس" و"جنين"،
يبرّد قلبك المحزون ..
ضفاير عـ الكتاف سارحة،
عيون بنوتة مرفوعة ..
بتدعى ربها وتمسح ..
دموع سابقاها مـ الفرحة

***********************

فقوم واغضب ..
ودوّر عـ الربيع .. والقاه
لأن البنت مستنيّة تلقى فـ حضنك الواسع ..
دفا الأهل اللى مش لقياه...
ساعتها تعدى مـ الخندق،
عشان توصل لكون ترضاه ..
تدوق الفرحة فى عنيها..
تقول " الله ".....

» تخيل نفسك كمبيوتر
» $$$اختبر نفسك... انطباعك عن الحب$$$
» اختبر نفسك .........إن كانت لديك صفات ومميزات تجذب الأصدقاء